Openluchtspel Roderwolde 24, 25, 28, 29 augustus

RODERWOLDE

Ok dit jaor wordt er in Rowol in het mooie theaoter an de Pastorielaon tegenover de kerk weer een openluchtspel opvoerd. Het Openluchtspel gef ok andacht an het speciaole Peter van der Velde-jaor, dat vanwege zien honderdste geboortejaor insteld is deur een speciaole

waarkgroep. Peter van der Velde was van 1954 tot 1979 hoofdmeester van de schoul in Rowol. Aj hoofdmeester binnen, dan weiten de vereinigingen van het dörp je vaok wel te vinden veur een bestuursfunctie. Dat was ok zo met het Openluchtspel, waor hij vanaof de oprichting negen jaor laank bai betrokken west is.

Zodounde vruig de waarkgroep of wai andaacht besteden zullen willen an dit speciaole jaor. Gelukkig was er in het stuk roemte veur wat aanpassingen, om zo wat heuren te laoten van gedichten die hij schreven het. Het stuk dat dit jaor opvoerd wordt, is ‘De nachtoel van Weering’. Het is schreven deur Ulla Kling en vertaold deur Henk Karstens.

Al een heile tied begunt er midden in de naacht in ’t dörp een haon te kraaien. Veur het jongvolk is dit dan meisttieds het teiken dat ze op hoes an moeten, mor veur de mensen die op berre liggen is ’t een grote argernis. Ondanks alle klachten prakkezeert de eigenaores er neit over om de haon vot te doun. De deierenbeschaarming stuurt een hounderdeskundige, die moet perberen de haon van zien nachtelijk gekraai of te helpen. Dat lukt hom neit zo ein, twei, drei. Mor hij ontdekt wel wat aans…

De oetvoeringen binnen op vrijdag 24 augustus, zaoterdag 25 augustus, dingsdag 28 augustus en woensdag 29 augustus. De oetwiekdaogen binnen 27 en 30 augustus. Het begunt ’s aovends om half negen.

Kaorten kuj vanaof 1 augustus reserveren op onze webstee - www.openluchtspel.nl - of in de veurverkoop op de bekinde adressen. Ons theaoter is rookvraai en veur wel neit te best heuren kan, is er een ringleiding.